दाङ, भदौ ९ ।
लिपुलेक र लिम्पियाधुराको विवाद नेपालको भूराजनीतिक संवेदनशील विषय भएको बताउँदै राष्ट्रिय स्वतन्त्र पार्टी लुम्बिनी प्रदेशका महामन्त्री निलराज अधिकारीले यो विषय दिनप्रतिदिन पेचिलो बन्दै गएको बताएका छन्।
अधिकारीले २०७७ सालमा नेपाल सरकारले जारी गरेको नयाँ राजनीतिक नक्सामा लिपुलेक, कालापानी र लिम्पियाधुरा क्षेत्र नेपालको अभिन्न अंगका रूपमा समावेश गरिसकेको स्मरण गर्दै, यो भूभागमा कुनै पनि विकसित वा शक्तिशाली देशले गिद्धदृष्टि नराख्नुपर्ने चेतावनी दिए।
भारतले आफ्नो सीमाभित्र पर्ने अडान राखे पनि सो भूभाग ऐतिहासिक प्रमाणसहित नेपालकै भएको ठोकुवा गर्दै अधिकारीले उच्चस्तरीय समझदारी मार्फत समस्याको समाधान निकाल्नुपर्ने सुझाव समेत दिएका छन्।
“लिपुलेक, कालापानी र लिम्पियाधुरा नेपालको अभिराज्य भूभाग हुन्, यसको रक्षा गर्नु सम्पूर्ण नेपाली हरूको कर्तव्य हो,” भन्दै उनले कुनै पनि विदेशी हस्तक्षेपलाई अस्वीकार्य रहेको स्पष्ट पार्नुभयो ।
