त्रिभुवन विश्वविद्यालयका आंगिक र सम्बन्धन प्राप्त क्याम्पसमा मंगलबार स्ववियुको नेतृत्व चयनका लागि देशभरी नै मतदान भएको छ । केही क्याम्पसमा भने तालाबन्दी, आन्तरिक विवाद लगायतले निर्वाचन स्थगित भएको छ ।
काठमाडौंको प्रदर्शनीमार्गमा रहेको आरआर क्याम्पसमा अनेरास्ववियुले सोमबार मध्यराति ताला लगाएका कारण निर्वाचन स्थगित छ । लैनचौरस्थित अस्कल क्याम्पसमा अखिल क्रान्तिकारीको तालाबन्दीपछि निर्वाचन स्थगित भएको छ । यस्तै, कीर्तिपुरको विश्विवद्यालय क्याम्पसमा नेविसंघको तालाबन्दीका कारण आज निर्वाचन नहुने भएको छ ।
यस्तै, बागबजारस्थित पद्मकन्यामा नविसंघको आन्तरिक विवादका कारण त्यहाँ निर्वाचन नभएको हो ।यसैगरी बागबजारकै शंकरदेव क्याम्पस, प्रदर्शनीमार्गका नेपाल ल र विश्वभाषामा पनि आन्तरिक विवादका कारण निर्वाचन स्थगित भएको छ । यसैगरी ठमेलको सरस्वती क्याम्पस, क्षेत्रपाटीको पब्लिक युथ क्याम्पसमा समेत निर्वाचन भएको छैन ।
मतदानका लागि आज बिहान ८ बजेदेखि दिउँसो ४ बजेसम्म समय तोकिएको छ ।
