पाल्पामा कार दुर्घटना हुँदा एक जनाको मृत्यु भएको छ । तानसेन नगरपालिका–१ नारनडाँडास्थित तानसेन–रानीमहल सडकखण्डमा आइतबार राति पौने ११ बजेतिर उक्त दुर्घटना भएको प्रहरीले जनाएको छ ।
तानसेनबाट रानीमहलतर्फ जाँदै गरेको भारतीय नम्बर प्लेट युपी १४ डिएन १०४ नम्बरको कार आफै अनियन्त्रित भई दुर्घटना भएको जिल्ला प्रहरी कार्यालय पाल्पाका प्रवक्ता प्रहरी नायब उपरीक्षक सुगन्ध श्रेष्ठले जानकारी दिनुभयो ।
दुर्घटनामा परी कार चालक भारतको उत्तर प्रदेशका २८ वर्षीय विकास पाठकको मृत्यु भएको छ । प्रहरी नायब उपरीक्षक श्रेष्ठका अनुसार दुर्घटनामा गम्भीर घाइते भएका पाठकलाई उपचारको लागि तानसेनस्थित मिसन अस्पतालमा लगिएकोमा चिकित्सकले मृत घोषणा गरेका थिए ।
दुर्घटनाग्रस्त कार सडकबाट करीब १५० मिटर तल खसेको छ । दुर्घटनाबारे थप अनुसन्धान भइरहेको प्रहरीले जनाएको छ ।