नेकपा एकीकृत समाजवादीका अध्यक्ष माधवकुमार नेपालले नेपालको कम्युनिष्ट आन्दोलन गम्भीर संकट र चुनौतीबाट गुज्रिरहेको बताउनुभएको छ ।
काठमाडौंमा सोमबार आयोजित ‘आजको सन्दर्भमा नेपाली विशेषताको समाजवाद’ विषयक विचार गोष्ठीकार्यक्रममा बोल्दै अध्यक्ष नेपालले यस्तो बताउनुभएको हो । उहाँले कम्युनिष्ट पार्टीभित्रमात्र नभएर हालको राजनीतिक परिस्थिति सबै राजनीति दलहरुको लागि चुनौतीपूर्ण रहेको टिप्पणी गर्नुभयो ।
राजनीतिक संकट, चुनौतीहरुको सामना गर्नको लागि पार्टीका प्रत्येक नेताहरुले सार्वजनिक कार्यक्रमहरुबाट आम नागरिक र कार्यकर्तामा सकारात्मकसन्देश दिनुपर्नेमा उहाँको जोड छ । उहाँले पार्टीका आन्तरिक समस्याका विषयहरुलाई पार्टी कमिटीमा राखेर यथार्थतामा अघि बढ्नुपर्ने बताउनुभयो । पार्टी संगठन निर्माणलाई तिव्रता दिनका निम्ति जिम्मेवारी पाएका नेताहरुको कार्य सम्पादनको प्रभावकारी अनुगमन आवश्यक रहेको उहाँको भनाइ छ ।
अध्यक्ष नेपालले पार्टीको पक्षमा दृढता साथ बोल्न नेता कार्यकर्ताहरुलाई निर्देशन समेत दिनुभयो । पार्टीसिद्धान्तमा आँच आउने काम गर्ने कसैलाई पनि छुट दिन नसकिने उहाँले चेतावनी समेत दिनुभएको छ।
कुनै पनि जिम्मेवारी नपाएको वरिष्ठ नेता गौतमको गुनासो
नेकपा एकीकृत समाजवादीका वरिष्ठ नेता वामदेव गौतमले पार्टीका नेताहरू काठमाडौं केन्द्रित भएको भन्दै आलोचना गर्नुभएको छ ।
काठमाडौंमा साेमबार आयोजित ‘आजको सन्दर्भमा नेपाली विशेषताको समाजवाद’ विषयक विचार गोष्ठी कार्यक्रममा बोल्दै वरिष्ठ नेता गौतमले यस्तो बताउनुभएको हो । पार्टीका सबै शीर्ष नेता राजधानी उपत्यकामा मात्र रहने प्रवृत्तिका कारण पार्टी संगठनलाई कमजोर बनाएको उहाँको भनाइ छ । उहाँले पार्टीका सबै सदस्यहरुलाई कुनै न कुनै जिम्मेवारी तोक्नुपर्नेमा जोड दिनुभयो । उहाँले पार्टीमा बसेर पार्टीको नीति र सिद्धान्त पालना नगरेका नेताहरुलाई ‘नक्कली कम्युनिष्ट’को संज्ञा दिनुभएको छ।
उहाँले सदस्यले समाजवाद बुझ्ने, समाजवाद निर्माणका लागि आजको परिस्थितिमा आवश्यक कार्य गर्ने र जनतासम्म पुग्ने जिम्मेवारी लिनुपर्ने बताउनुभएको छ । पार्टीका शीर्ष नेताहरु जनताको माझ नगएसम्म कार्यकर्तामा उत्साह पैदा नहुने उहाँको थियो । आफूमा पार्टीमा आवद्ध भएको २ महिना पुग्दा समेत पार्टीले जिम्मेवारी नदिएको भन्दै उहाँले गुनासो समेत गर्नुभएको छ ।
कम्युनिष्ट पार्टीहरु सिद्धान्त बिना संचालन हुन नसक्ने उल्लेख गर्दै वरिष्ठ नेता गौतमले अन्तरपार्टी संघर्ष आवश्यक रहेको बताउनुभयो ।
