लुम्बिनी प्रदेशमा जारी प्रधानमन्त्री कप पुरुष एक दिवसीय राष्ट्रिय क्रिकेट प्रतियोगितामा कर्णाली प्रदेशले कोशी प्रदेशलाई २१९ रनको लक्ष्य दिएको छ ।
पहिला ब्याटिङ गर्दै कर्णालीले निर्धारित ५० ओभरमा ९ विकेट गुमाउँदै २१८ रन बनायो । कर्णालीका लागि अर्जुन घर्तीले ८८ रनको नटआउट पारी खेले । ९५ बलको सामना गरेका अर्जुनले ११ चौका र २ छक्का प्रहार गरे ।
यस्तै हिमान्सु शाहीले ४६ रन बनाउँदा निश्चल रावलले २०, प्रकाश जैशीले १८, सुनिल धमलाले १३ र वीपीन रावलले १० रनको योगदान दिए ।
बलिङतर्फ कोशीका लागि श्रवण किस्कु महँगो सावित भए । एक विकेट हात पारे पनि उनले ६ ओभर बलिङ गर्दै ४५ रन खर्चिए ।
यस्तै विपिन महतोले ९ ओभरमा ४७ रन खर्चिँदै तीन विकेट लिए । दिपेश कँडेल र प्रकाश कार्कीले २/२ विकेट लिँदा सुजन थपलियाको नाममा एक विकेट रह्यो ।
