कमला सापकोटा पौडेल
सिद्धिपुर, १३ फागुन ।
होराइजन अङ्ग्रेजी आवासीय माध्यमिक विद्यालय वाणगंगा ४ सिद्धिपुर कपिलवस्तुमा सञ्चालित विभिन्न प्रतिशपर्धाहरुको नतिजा सार्वजनिक गरिएको छ । मंगलवार विद्यालयको विहानी सभालाई सम्बोधन गर्दै प्राचार्य बासुदेव घिमिरेले विद्यालयमा सञ्चालित खाना महोत्सव, जुनियर लेभल वादविवाद प्रतियोगिता र सिनियर लेभल वादविवाद प्रतियोगिताको नतिजा सार्वजनिक गर्नु भएको हो ।
“विद्यार्थीहरुलाई किताबी ज्ञानमा मात्र सिमित नगरि उनीहरुको सर्वाङ्गिण विकासमा विद्यालयले विशेष जोड दिएको छ । सँस्कारयुक्त शिक्षा आजको आवश्यकता हो । सुसँस्कृत, सभ्य नागरिक निर्माणमा हामी लागि परेका छाँै ।” प्राचार्य बासुदेव घिमिरेले भन्नुभयो ।
शैद्धान्तिक शिक्षा भन्दा व्यवहारिक शिक्षा नै उत्तम शिर्षकमा गरिएको कक्षा ७ देखि कक्षा ९ सम्मको प्रतियोगतामा रातो सदनकी परिसा गौतमले प्रथम स्थान हाशिल गरेकी छिन् । सोहि प्रतियागितामा नीलो सदनमा आवद्ध कक्षा ९ की सविना आचार्य द्धितीय हुँदा रातो सदनका कक्षा ७ का विद्यार्थी सन्देश गैरे र सुदर्सन पोख्रेलले तेस्रो स्थान हाशिल गरेको विद्यालयले जनाएको छ ।
यस्तै कक्षा ३ देखि ६ को धन भन्दा विद्या ठूलो विषेययक वादविवाद प्रतियोगितमा हरियो सदनकी एञ्जीला गैरे प्रथम, रातो सदनकी श्रुति पौडेलले द्धितीय, दीगंगना शाहि र मिसन मरासिनी तृतीय तथा संस्कार रेग्मीले सान्तवना स्थान प्राप्त गरेका छन् । सवै विद्यार्थीहरुले उत्कृष्ट प्रस्तुति राख्दा आफूलाई निर्णय गर्न हम्य हम्य परेको निर्णायक संयोजक प्राध्यापक टीकाराम अर्यालको भनाई छ ।
फुड फेस्टीभलमा हरियो सदन प्रथम, सेतो सदन द्धितीय, र रातो तथा नीलो सदनले तृतीय स्थान हासिल गरेका छन् । अन्तरसदनात्मक खाना महोत्सवमा विद्यार्थीहरुले स्वायविनको छोइला, साँदेको सिन्की, कोदोको सेलरोटी, फापरको रोटी, पकौडा चुकौनी बटुक, खिर पुरी अचार लगायत परम्परागत अर्गानिक स्वादिष्ट परिकारहरु तयार पारेका थिए ।
