अर्घाखाँचीको शितगंगा नगरपालिका–१२ हिलेखोलामा जीप दुर्घटना हुँदा एक जनाको मृत्यु भएको छ । यस्तै नौ जना यात्रु घाइते भएका छन् ।
छत्रदेव गाउँपालिकाबाट बुटवलका लागि छुटेको लु १ ज ४७६३ नम्बरको जीप बुधवार बिहान गोरुसिङ्गे–सन्धिखर्क सडक अन्तर्गत हिलेखोलामा दुर्घटना भएको हो । दुर्घटनामा छत्रदेव–५ टुनिचौरका ६५ वर्षका रामप्रसाद पन्थीको मृत्यु भएको जिल्ला प्रहरी कार्यालय अर्घाखाँचीले जनाएको छ ।
दुर्घटना घाइते भएका नौ जनामध्ये छत्रदेव–५ का चुराबहादुर खत्री, सावित्रा विक र दीक्षा पौडेललाई थप उपचारका लागि बुटवल रेफर गरिएको प्रहरीले जनाएको छ । अन्य घाइतेहरुको प्राथमिक स्वास्थ्य केन्द्र ठाडामा उपचार भइरहेको प्रहरीले जनाएको छ ।